Cyber Fraud: ડિજિટાઈઝેશનના યુગમાં મોબાઈલ નંબર, ઈમેઈલ, બેન્ક એકાઉન્ટ, સોશિયલ મીડિયા હેન્ડલ, વેબસાઈટ્સ, યુપીઆઈ જેવી સુવિધાઓ લોકોનું જીવન સરળ બનાવ્યું છે. પરંતુ તેમાં સાયબર અટેકનું જોખમ પણ એટલું જ વધ્યું છે. અનેક લોકોએ સાયબર અટેકમાં લાખો કરોડો રૂપિયા ગુમાવ્યા છે. આરબીઆઈ, કેન્દ્ર સરકાર સહિત વિવિધ સંસ્થાઓ નકલી ફોન કોલ, ફ્રોડ ઈમેઈલથી સાવચેત રહેવા અવારનવાર અપીલ કરે છે. આજે અમે તમને આ ફ્રોડથી બચવાનો સરળ રસ્તો જણાવવા જઈ રહ્યા છીએ.
જો તમે પણ સાયબર હુમલાથી બચવા માગતા હોવ તો આ એક જ હેલ્પલાઈનની મદદથી નકલી મોબાઈલ નંબર, સ્પેમ ઈમેઈલ, નકલી સોશિયલ મીડિયા એકાઉન્ટ વિશે માહિતી મેળવી શકો છો. જેના માટે થર્ડ પાર્ટી એપની પણ જરૂર નથી. નેશનલ સાયબર ક્રાઈમ રિપોર્ટિંગ પોર્ટલની મદદથી તમે સાયબર ફ્રોડના ગુનાઓ નોંધાવી પણ શકો છો અને ટ્રેક પણ કરી શકો છો. તેમજ સંદિગ્ધ ફોન નંબર, ઈમેઈલ આઈડી આપી તેના વિશે માહિતી પણ મેળવી શકો છો.
આ પણ વાંચોઃ સરહદી જિલ્લામાં સુરક્ષાની સમીક્ષા કરાઈ, ગુજરાતના મુખ્યમંત્રીની PM મોદી સાથે ટેલિફોનિક વાતચીત
આ રીતે ચેક કરો
- NCCRPની વેબસાઈટ ની મુલાકાત લો. જેમાં Report & Check Suspect વિકલ્પ પર ક્લિક કરો.
- Report & Check Suspectમાં ત્રણ વિકલ્પો ખુલશે. જેમાં જો તમે સંદિગ્ધ મોબાઈલ કે ઈમેઈલ, વેબસાઈટ, એપ્સ વિશે વિગતો ચકાસવા માગતા માગતા હોવ તો પ્રથમ વિકલ્પ Suspect Repository પસંદ કરી શકો છો. ફરિયાદ નોંધાવા માટે બીજો વિકલ્પ Report Suspect અને GAC સાથે અપીલ કરવા માટે ત્રીજો વિકલ્પ File an Appeal with GAC પસંદ કરી શકો છો.
- Suspect Repositoryમાં ક્લિક કરતાં મોબાઈલ, ઈમેઈલ, બેન્ક એકાઉન્ટ, સોશિયલ મીડિયા, યુપીઆઈ આઈડીની ખરાઈ કરી શકો છો.
દરેક ફેક નંબર શોધવા સક્ષમ નહીં
આ વેબસાઈટ પરથી મોટાભાગની મોબાઈલ નંબર, બેન્ક એકાઉન્ટ, ઈમેઈલ, સોશિયલ મીડિયા, યુપીઆઈ આઈડી સહિતની વિગતો ચકાસી શકો છો. જો કે, ઘણીવાર તદ્દન નવો નંબર કે તદ્દન નવુ એકાઉન્ટ હોય તો તેના વિશે વિગતો મળવી મુશ્કેલ પણ બની શકે છે. કારણકે આ પોર્ટલ સાયબર ક્રાઈમ સાથે જોડાયેલી ફરિયાદોના ડેટાબેઝના આધારે કામ કરે છે. ઉલ્લેખનીય છે, આ વેબસાઈટ પરથી તદ્દન મફતમાં તમે ઘરેબેઠા સંદિગ્ધ એકાઉન્ટ વિશે માહિતી મેળવી શકો છો.
