મુંબઈ : અમેરિકાના ઊંચા ટેરિફની દેશના વિવિધ ક્ષેત્રો પર પ્રતિકૂળ અસર પડી રહી છે જેમાં કટ તથા પોલિશ્ડ ડાયમન્ડસની નિકાસનો પણ સમાવેશ થાય છે. એક રેટિંગ એજન્સી દ્વારા તૈયાર કરાયેલા રિપોર્ટ પ્રમાણે વર્તમાન નાણાં વર્ષમાં દેશમાંથી કટ અને પોલિશ્ડ ડાયમન્ડસની નિકાસમાં ૧૭થી ૨૦ ટકા જેટલો ઘટાડો જોવા મળશે.
ઊંચા ટેરિફને કારણે ભારતના ડાયમન્ડસની કિંમત અમેરિકામાં વધી ગઈ છે.
ઊંચા ટેરિફ અંતિમ વપરાશકારો પર પસાર કરવામાં આવી રહ્યા હોવાથી તેની ડાયમન્ડસની કિંમતમાં નોંધપાત્ર વધારો થયો છે. કિંમતો વધી જતા કટ તથા પોલિશ્ડ ડાયમન્ડસની માગ પર અસર જોવા મળી રહી છે.
માગ ઘટી જવાને કારણે વર્તમાન નાણાં વર્ષમાં ભારતની કટ તથા પોલિશ્ડ ડાયમન્ડસની નિકાસ ૧૭થી ૨૦ ટકા જેટલી ઘટી ૧૧ અબજ ડોલર રહેવા એજન્સીના રિપોર્ટમાં ધારણાં મૂકવામાં આવી છે.
ભારતના કટ તથા પોલિશ્ડ ડાયમન્ડસ માટે અમેરિકા એક મોટી બજાર છે. વિશ્વમાં પોલિશ્ડ થતા ડાયમન્ડસમાંથી મૂલ્યની દ્રષ્ટિએ ૯૦ ટકા ડાયમન્ડસનું પ્રોસેસિૅગ ભારતમાં થાય છે.
વિશ્વમાં પોલિશ્ડ ડાયમન્ડસની કુલ માગમાંથી ૪૦ ટકા માગ અમેરિકાની રહે છે. કટ અને પોલિશ્ડ ડાયમન્ડ ઉદ્યોગ એક અંકી પ્રોફિટ માર્જિન પર કામ કરે છે અને ૫૦ ટકા જેટલા ઊંચા ટેરિફને પરિણામે મૂલ્ય સાંકળ પરના દબાણમાં વધારો થશે એમ રિપોર્ટમાં નોંધવામાં આવ્યું છે.
ડાયમન્ડ ઉદ્યોગ હાલમાં લેબ ગ્રોન ડાયમન્ડસ તરફથી સ્પર્ધાનો સામનો કરી રહ્યો છે ત્યારે ઊંચા ટેરિફથી સ્થિતિ વધુ વણસવાની ચિંતા વ્યકત કરવામાં આવી રહી છે.
