Five Key Changes from Today: પહેલી ફેબ્રુઆરી 2026ના રોજ દેશનું સામાન્ય બજેટ રજૂ થવા જઈ રહ્યું છે, ત્યારે તેની સાથે જ પાંચ મોટા ફેરફારો અમલી બન્યા છે. જેમાં કોમર્શિયલ ગેસ સિલિન્ડરના ભાવમાં વધારો ઝીંકવામાં આવ્યો છે, જ્યારે બીજી તરફ FASTag અને એરલાઇન ઇંધણના ભાવમાં રાહત મળી છે.
પહેલો ફેરફાર: LPG સિલિન્ડર મોંઘા થયા
ઓઇલ માર્કેટિંગ કંપનીઓ દર મહિનાના પહેલા દિવસે LPG સિલિન્ડરના ભાવમાં સુધારો કરે છે અને ફેબ્રુઆરીના પહેલી ફેબ્રુઆરી, 2026ના રોજ નવા LPG ભાવ જાહેર કરવામાં આવ્યા હતા. બજેટના દિવસે, ઓઇલ માર્કેટિંગ કંપનીઓએ સતત બીજા મહિને 19 કિલોગ્રામના LPG સિલિન્ડરના ભાવમાં વધારો કર્યો, જેનાથી તે 50 રૂપિયા મોંઘો થયો.
નવા ભાવ પર નજર કરીએ તો, દિલ્હીમાં તે 1691.10 થી વધીને 1740.50 રૂપિયા, કોલકાતામાં 1795થી વધીને1844.50 રૂપિયા, મુંબઈમાં 1642.50થી વધીને 1692 રૂપિયા અને ચેન્નાઈમાં 1849.50થી વધીને 1899.50 રૂપિયા થઈ ગયા છે. જોકે, 14 કિલોગ્રામના ઘરેલુ ગેસ સિલિન્ડરની કિંમત યથાવત્ રહી છે.
બીજો ફેરફાર: હવાઈ મુસાફરી સસ્તી થશે
એલપીજી સિલિન્ડરના ભાવમાં ફેરફાર ઉપરાંત, ઓઇલ માર્કેટિંગ કંપનીઓએ પહેલી ફેબ્રુઆરીથી ઉડ્ડયન ઇંધણના ભાવમાં બીજો ફેરફાર કરીને તેમાં ઘટાડો કર્યો છે. હવાઈ ટર્બાઇન ફ્યૂલના ભાવમાં કોઈપણ ફેરફાર હવાઈ મુસાફરીના ખર્ચમાં વધઘટ લાવી શકે છે.
ગયા મહિનાની શરૂઆતમાં પહેલી જાન્યુઆરીએ ATFના ભાવમાં ઘટાડો કરવામાં આવ્યો હતો, અને દિલ્હીમાં ભાવ લગભગ 7 ટકા ઘટ્યા હતા. ફેબ્રુઆરીના પહેલા દિવસે પણ તે ઘટ્યો હતો. દિલ્હીમાં, તે 92,323.02 પ્રતિ કિલોલિટરથી ઘટીને 91,393.39 રૂપિયા પ્રતિ કિલોલિટર થયો હતો. કોલકાતામાં, તે 95,378.02થી ઘટીને 94,445.62 રૂપિયા, મુંબઈમાં 86,352.19થી ઘટીને 85,474.63 રૂપિયા અને ચેન્નાઈમાં 95,770થી ઘટીને 94,781.99 રૂપિયા થયો હતો.
આ પણ વાંચો: બજેટ પહેલા મોટો ઝટકો, કોમર્શિયલ ગેસ સિલિન્ડરના ભાવમાં ₹50નો તોતિંગ વધારો
ત્રીજો ફેરફાર: પાન મસાલા અને સિગારેટ પર વધારાનો કર
પાન મસાલા અને સિગારેટ પ્રેમીઓને આંચકો આપે તેવી શક્યતા છે. અહેવાલ અનુસાર, પહેલી ફેબ્રુઆરી, 2026થી તમાકુ ઉત્પાદનો અને પાન મસાલા પર વધુ ટેક્સ લાગી શકે છે. સરકારે GST વળતર ઉપકરની જગ્યાએ નવી એક્સાઇઝ ડ્યુટી અને ઉપકર જાહેર કર્યો છે. તમાકુ અને પાન મસાલા પર નવા ટેક્સ લાગુ GST દરો ઉપરાંત લાદવામાં આવશે. GST ઉપરાંત પાન મસાલા પર આરોગ્ય અને રાષ્ટ્રીય સુરક્ષા ઉપકર લાદવામાં આવશે, જેનાથી તેની કિંમતોમાં વધારો થશે.
ચોથો ફેરફાર: FASTag યૂઝર્સ માટે ફેરફારો
FASTag સાથે સંકળાયેલા નિયમો પણ પહેલી ફેબ્રુઆરીથી બદલાશે. નેશનલ હાઇવે ઓથોરિટી ઓફ ઇન્ડિયા (NHAI)એ આજથી કાર, જીપ અને વાન માટે FASTag જાહેર કરવા માટે KYC ચકાસણી પ્રક્રિયા બંધ કરવાની જાહેરાત કરી છે, જે યૂઝર્સ માટે નોંધપાત્ર રાહત છે. આ નિયમ પણ આજથી અમલમાં આવશે.
પાંચમો ફેરફાર: બેન્ક રજાઓ
જો તમારી પાસે આ મહિને કોઈ તાત્કાલિક બેંકિંગ કામ હોય, તો ઘરેથી નીકળતા પહેલા બેન્ક રજાઓની યાદી તપાસો. હકીકતમાં, ભારતીય રિઝર્વ બેન્કની વેબસાઇટ પર અપલોડ કરાયેલી યાદી અનુસાર, સાત દિવસની સાપ્તાહિક રજા સહિત, છત્રપતિ શિવાજી મહારાજ જયંતિ જેવા પ્રસંગો માટે આશરે 10 દિવસની રજાઓ જાહેર કરવામાં આવી છે. નોંધપાત્ર રીતે, ફેબ્રુઆરીની શરૂઆત રજાથી થઈ રહી છે.
