નવી દિલ્હી : ભારતીય કંપનીઓ સપ્ટેમ્બર ક્વાર્ટરમાં સામાન્ય કામગીરી નોંધાવે તેવી અપેક્ષા છે. નિફ્ટી કંપનીઓ માટે ચોખ્ખો નફો વાર્ષિક ધોરણે લગભગ ૬-૭% વધવાનો અંદાજ છે. મોટાભાગના ક્વાર્ટરમાં માંગનું વાતાવરણ ધીમું પડયું હોવાથી અને ૨૨ સપ્ટેમ્બર સુધી ખર્ચ રોકી રાખવામાં આવ્યો હોવાથી, ગ્રાહકલક્ષી કંપનીઓ સામાન્ય પરિણામો જાહેર કરે તેવી શક્યતા છે તેમ વિશ્લેષકોનું માનવું છે.
ત્રિમાસિક ગાળા દરમિયાન રૂપિયામાં ૩%થી વધુનો તીવ્ર ઘટાડો નિકાસકારો માટે આકરો પુરવાર થશે.
આ ઉપરાંત, ખૂબ જ ભારે અને લાંબા ચોમાસાને કારણે પેઇન્ટ જેવા ઉત્પાદનોના વેચાણ તેમજ ફાસ્ટ-ફૂડ ક્ષેત્રના વ્યવસાય પર અસર પડી હોવાનું માનવામાં આવે છે.
નાણાકીય વર્ષ ૨૦૨૬ના બીજા ક્વાર્ટરમાં તેલ અને ગેસ, ધાતુઓ અને સિમેન્ટ જેવા ક્ષેત્રોમાં કંપનીઓની કમાણીમાં ઉછાળો જોવાશે. બીજી બાજુ, બેંકો નબળા પરિણામો જાહેર કરે તેવી અપેક્ષા છે.
સપ્ટેમ્બર ૨૦૨૫ ક્વાર્ટર બેંકો માટે બીજો નબળો ક્વાર્ટર હશે, જેમાં ચોખ્ખા વ્યાજ માર્જિનમાં સંકોચન અને ટ્રેઝરી આવકમાંથી ઓછા યોગદાનને કારણે આવક વૃદ્ધિ પર અસર પડશે.
ભારતીય કંપનીઓનું પ્રદર્શન જૂન ક્વાર્ટર સમાન રહેવાની શક્યતા છે જ્યારે કુલ ચોખ્ખા નફામાં (૩,૪૦૧ કંપનીઓનો સર્વે) વાર્ષિક ધોરણે ૬% (વાર્ષિક ધોરણે) વધારો થયો હતો, જે ચોખ્ખા વેચાણમાં ૬% વાર્ષિક ધોરણે વધારો દર્શાવે છે.
૯ ઓક્ટોબરથી શરૂ થતી સિઝન પહેલા વિશ્લેષકો દ્વારા કમાણીના અંદાજમાં કાપ મૂકવામાં આવી રહ્યો છે. નાણાકીય વર્ષ ૨૦૨૬ માટે તેમના નિફ્ટી કમાણીના અંદાજમાં અનુક્રમે ૧.૧% અને નાણાકીય વર્ષ ૨૦૨૭ માટે ૧.૭% ઘટાડો કર્યો છે. નોમુરાના વિશ્લેષકો માને છે કે કમાણી ડાઉનગ્રેડ ચક્ર વધુ કાપ સાથે ચાલુ રહી શકે છે. નોમુરાએ ૪-૫% ઘટાડાનો અંદાજ લગાવ્યો છે.
