મુંબઈ : રશિયા પાસેથી ક્રુડ ઓઈલ નહીં ખરીદવા ભારત પર અમેરિકાના સતત દબાણની અસર જોવા મળી રહી છે અને આવનારા દિવસોમાં રશિયા ખાતેથી ક્રુડ તેલનો પૂરવઠો લગભગ અટકી જશે એવી શકયતા જોવાઈ રહી છે.
પ્રાપ્ત અહેવાલ પ્રમાણે રશિયાનું ક્રુડ ઓઈલ લઈને ભારત આવી રહેલા એક ટેન્કરે બાલ્ટિક સીમાં અધવચ્ચેથી જ યુ ટર્ન લેવો પડયો છે. અમેરિકા દ્વારા રશિયાની કંપનીઓ પર પ્રતિબંધ મૂકવાને કારણે ભારતના ક્રુડ તેલ ખરીદનારાઓ હવે અમેરિકાના આદેશનું પાલન કરવા લાગ્યા છે જેના ભાગરૂપ જ આ ટેન્કરને પાછુ વાળવામાં આવ્યું હોવાનું માનવામાં આવી રહ્યું છે.
રશિયાની ક્રુડ તેલ પૂરવઠેદાર કંપની રોઝનેફટ જેના પર અમેરિકાએ પ્રતિબંધ મૂકયો છે તેનું ક્રુડ તેલ ભારત આવી રહ્યું હતું. રશિયાની અન્ય એક કંપની લુકઓઈલ પર પણ પ્રતિબંધ મુકાયો છે.
ભારત આવી રહેલા ઓઈલ ટેન્કર પર ગુજરાતના બંદર સિક્કાનો પ્રારંભમાં ઉલ્લેખ કરાયો હતો.આ બંદરનો ઉપયોગ રિલાયન્સ ઈન્ડ. તથા બીપીસીએલ દ્વારા કરવામાં આવે છે. આ જહાજ નવેમ્બરના મધ્યમાં આ બંદરે પહોંચવાની શકયતા હતી, એમ શિપની અવરજવરની માહિતી પૂરી પાડતા પ્લેટફોર્મ કેપ્લર અને વોરટેકસાએ દર્શાવ્યુ હોવાનું એક અહેવાલમાં જણાવાયું હતું.
રશિયા સામે પશ્ચિમી દેશોની સખતાઈને પરિણામે ભારતને રશિયા ખાતેથી મળી રહેલા સસ્તા ક્રુડ તેલનો પૂરવઠો હવે લગભગ અટકી પડવાની સ્થિતિ ઊભી થઈ છે.
અમેરિકા દ્વારા લાગુ કરાયેલા પ્રતિબંધોનું સંપૂર્ણપણે પાલન કરાશે તેવી રિલાયન્સ દ્વારા ખાતરી ઉચ્ચારવામાં આવી છે. રોઝનેફટ સાથે રિલાયન્સના લાંબા ગાળાના કરાર છે.
અમેરિકાના પ્રતિબંધ ભારતની ઓઈલ રિફાઈનરીઓ રશિયાના ક્રુડ ઉત્પાદકો પાસેથી ક્રુડ ઓઈલ ખરીદવામાં પાછીપાની કરી રહી છે.
