અમદાવાદ, મંગળવાર
પૂર્વ વિસ્તારમાં હિટ એન્ડ રન તથા અકસ્માતે મોતના બનાવોમાં ચિંતાજનક વધારો થઇ રહ્યો છે. વટવામાં બનેલી હિટ એન્ડ રનની ઘટનામાં બાળકોને સ્કૂલેથી લેવા પગપાળા જઇ રહેલી મહિલાને અજાણ્યા વાહન ચાલકે ટક્કર મારી હતી. સારવાર દરમિયાન મોત થયું હતું. આ બનાવ અંગે ટ્રાફિક જે ડિવિઝન પોલીસે અજાણ્યા વાહન ચાલક સામે ગુનો નાંેધીને સીસીટીવી ફૂટેજ આધારે વધુ તપાસ શરુ કરી છે.
બાળકોને સ્કૂલે લેવા પગપાળા જઇ પરત ના ફરતા ભાઇએ તપાસ કરતાં હોસ્પિટલમાંથી લાશ મળી, ટ્રાફિક પોલીસે ગુનો નોંધીને સીસીટીવી ફૂટેજ આધારે વધુ તપાસ હાથ ધરી
વટવામાં રહેતી મહિલા તા. ૨૫ના રોજ બાળકોને સ્કૂલે લેવા ચાલતા જતા હતા અને વટવા કેદારમ ૪૪ પાસે પહોચ્યા તે સમયે પૂરઝડપે આવી રહેલા અજાણ્યા વાહન ચાલકે મહિલાને ટક્કર મારતા તેઓ રોડ પર પટકાતા માથાના સહિત શરીરે ગંભીર ઇજાઓ પહોચતા બેભાન થઇ ગયા હતા. અકસ્માત થતા આસપાસના લોકો ભેગા થતા અજાણ્યો વાહન ચાલક ટક્કર મારીને નાસી ગયો હતો.
ઇજાગ્રસ્ત મહિલાને સારવાર માટે એલ.જી. હોસ્પિટલમાં લઇ જવામાં આવ્યા હતા. જ્યાં સારવાર દરમિયાન મોત થયું હતું. જો કે બાળકોને લઇને સ્કૂલેથી પરત ના આવતાં તેમના ભાઇએ તપાસ કરતાં હોસ્પિટલમાં ગયા અને મોતની જાણ થઇ હતી. આ ઘટના અંગે મૃતક મહિલાના ભાઇએ ટ્રાફિક પોલીસ સ્ટેશનમાં અજાણ્યા વાહન ચાલક સામે ફરિયાદ નોંધાવતા પોલીસે આસપાસના સીસીટીવી ફૂટેજ આધારે વધુ તપાસ હાથ ધરી છે.
