(પ્રતિનિધિ તરફથી) અમદાવાદ,મંગળવાર
વટવામાં ગયા વર્ષ દરમિયાન સત્તા સંભાળનારા ડિરેક્ટરોએ પાણીના વિતરણમાં પક્ષપાતી વલણ દાખવ્યું હોવાથી ગિન્નાયેલી યુવા પેઢીએ આગામી પાંચ વર્ષ માટે યોજવામાં આવનારી વટવા ગ્રીનની ચૂંટણીમાં યુવાનોની નવી પેનલ ઊભી કરી દીધી છે.નાના ઉદ્યોગોનું નેતૃત્વ કરતી પેનલ યુનાઈટેડ વટવા છે. આ પેનલ અંકિત શંકરલાલ પટેલના નેતૃત્વમાં ઊભી થઈ છે. જ્યારે આનંદ પટેલના નેતૃત્વ હેઠળ બીજી પ્રગતિ પેનલ ચૂંટણી લડવા અને ગયા વરસે કેટલાક તત્વોએ કરેલી ગેરરીતિને નાબૂદ કરી દઈને ઔદ્યોગિક એકમોની તમામ જરૃરિયાત પૂર્ણ કરવા માટે ચૂંટણી લડવા સજ્જ થઈ ગઈ છે.
પ્રગતિ પેનલના અગ્રણી આનંદ પટેલનું કહેવું છે કે અમે મેમ્બરોના હિતમાં અને સંસ્થાના હિતમાં તથા વટવાનો વિકાસ થાય તે રીતે કામ કરવા વચનબદ્ધ છીએ. મેમ્બરોને કોઈ જ તકલીફ ન પડે અને પોલ્યુશનના દરેક ધારાધોરણોનું પાલન થાય તે રીતે કોમન એફ્લુઅન્ટ ટ્રીટમેન્ટ પ્લાન્ટ ચાલે તેની તકેદારી રાખીશું.
જોકે પ્રગતિ પેનલના જાણકારોનું કહેવું છે કે ગયા વરસે અમારી જે પાણીના વિતરણમાં અમારી ભૂલ થઈ હતી તે ભૂલ કરનારને અમે અમારા ગુ્રપમાંથી કાઢી મૂક્યો છે. હવેથી ઉદ્યોગોની પાણીના વિતરણની સમસ્યા ન નડે તે માટે પ્રયાસ કરવામાં આવશે. હવે અમે પારદર્શક વહીવટ આપવા સજ્જ થઈ રહ્યા છે. પર્યાવરણનો પ્રશ્ન ઘણો જ ગંભીર છે. તેનો ઉકેલ લાવવો એ માત્ર યુવાનિયાઓનું કામ નથી. તેને માટે અનુભવીઓને સાથે રાખવા જરૃરી છે.
બીજીતરફ યુનાઈટેડ વટવા પેનલના સૂત્રોનું કહેવું છે કે પ્રગતિ પેનલની સુસ્તીને પરિણામે કેન્દ્ર અને રાજ્ય સરકારની અંદાજે રૃા. ૨૦ કરોડની ગ્રાન્ટ વટવા ગ્રીને ગુમાવવી પડી છે. તેમાં પર્યાવરણ માટે મંજૂર થયેલી રૃા. ૭ કરોડની ગ્રાન્ટ તો ડોક્યુમેન્ટેશન ન થવાથી લેપ્સ થઈ ગઈ છે. બાકીની ગ્રાન્ટ મેળવવાનો અમે પ્રયાસ કરીશું.
બીજીતરફ યુનાઈટેડ વટવાની પેનલના જાણકારોનું કહેવું છે કે શંકરભાઈ પટેલે વટવાના ઔદ્યોગિક એકમો માટે ૩૨ એમએલડી-મેગા ગેલન પાણી લાવવાનો માટેની પરમિશન મેળવવાનો પ્રયાસ ચાલુ કર્યો હતો તે પ્રયાસને પૂર્ણ કરીને અમે દરેક ઔદ્યોગિક એકમોને પાણી મળે અને પારદર્શક વહીવટ થાય તે માટેના પ્રયાસો કરીશું. અત્યારે વટવાને ૨૨ મેગા ગેલન પાણી મળે છે. આ જ રીતે વટવાને ક્રિટીકલી પોલ્યુટેડ એરિયા જાહેર કરવામાં આવ્યો છે. ચાર વર્ષથી વટવાને ક્રિટિકલી પોલ્યુટેડ ઝોનમાંથી બહાર કાઢી શકાઈ નથી. અમે આાગમી બે વર્ષમાં વટવાને ક્રિટીકલી પોલ્યુટેડ ઝોનમાંથી બહાર કાઢવા પ્રયાસો કરીશું. તેમ થવાથી નાના ઉદ્યોગોને તેમના પ્લાન્ટનું વિસ્તરણ કરવાની અને ઉત્પાદન વધારવાની તક મળશે. આ તકથી તેઓ છેલ્લા ચાર વર્ષથી વંચિત છે. અમારા માટે આ સૌથી વધુ મહત્વનો મુદ્દે છે. અમે તેને માટે તનતોડ મહેનત કરીને મંજૂરી મેળવવા દિલોજાનથી પ્રયત્ન કરીશું.
