Stock Market News: દેશના પાંચ રાજ્યો પશ્ચિમ બંગાળ, કેરલમ, આસામ, તમિલનાડુ અને પુડુચેરીમાં થયેલી વિધાનસભા ચૂંટણીના પરિણામોના દિવસે શેરબજારમાં તેજીનું વાવાઝોડું આવ્યું છે. આજે વહેલી સવારથી જ મતોની ગણતરી શરૂ થતા અને રાજકીય વલણો આવતાની સાથે જ શેરબજારમાં તેની સીધી અસર જોવા મળી હતી.
સેન્સેક્સ મોટો ઉછાળો
સેન્સેક્સ અને નિફ્ટી બંને મુખ્ય ઈન્ડેક્સ શુક્રવારના બંધ સ્તર કરતા નોંધપાત્ર તેજી સાથે ઓપન થયા હતા. બજારના વિશ્લેષકો આ તેજી પાછળ ચૂંટણી પરિણામોથી ઊભી થનારી રાજકીય સ્થિરતાની આશાને મુખ્ય કારણ ગણાવી રહ્યા છે. શેરબજારના આંકડાઓની વાત કરીએ તો, બોમ્બે સ્ટોક એક્સચેન્જ (BSE) નો Sensex શુક્રવારના 76,913 ના લેવલ સામે તેજી સાથે 77,257 પર ઓપન થયો હતો અને જોતજોતામાં મિનિટોની અંદર તે 830 પોઈન્ટ્સના ઉછાળા સાથે 77,746 ના સ્તરે પહોંચી ગયો હતો.
આ પણ વાંચો: સોફ્ટ ડ્રિંક્સ પરનો GST 28 થી વધારીને 40 ટકા કરાયો; પણ ભાવ નહીં વધે! જાણો કેમ?
નિફ્ટીમાં પણ તેજી
આવી જ સ્થિતિ નેશનલ સ્ટોક એક્સચેન્જ (NSE) Niftyમાં પણ જોવા મળી હતી, જે તેના અગાઉના 23,997 ના બંધ સ્તરથી વધીને 24,000 ની ઉપર ખુલ્યો હતો અને જોરદાર ગતિ પકડતા 24,245 ના સ્તરે કારોબાર કરતો જોવા મળ્યો હતો.
કયા કયા શેર ઉછળ્યાં
બજારમાં જોવા મળેલી આ તેજીમાં દિગ્ગજ કંપનીઓના શેરોએ મુખ્ય ફાળો આપ્યો હતો. લાર્જકેપ શેરોમાં Maruti (4.10%), HUL (3.95%), LT (2.50%), Asian Paints (2.40%) અને Adani Ports (2.35%) વધારા સાથે ટ્રેડ કરી રહ્યા હતા. માત્ર એટલું જ નહીં, પરંતુ બેંકિંગ સેક્ટરમાં પણ ભારે લેવાલી નીકળતા Axis Bank (1.80%), HDFC Bank (1.60%) અને SBI (1.30%) ના શેરોમાં પણ મોટો ઉછાળો નોંધાયો હતો. રોકાણકારો પરિણામોના દરેક અપડેટ પર નજર રાખી રહ્યા છે અને બજારમાં હજુ પણ વોલેટાલિટી રહેવાની શક્યતા છે.
