ભારત-પાકિસ્તાન તણાવની જોવાયેલી અસર
અમદાવાદ : રાજસ્થાન, પંજાબ, ગુજરાત અને જમ્મુ અને કાશ્મીર જેવા સરહદી રાજ્યોમાં મે મહિનામાં દૈનિક ઉપયોગની ચીજવસ્તુઓ (એફએમસીજી) ના વેચાણમાં વધારો થયો છે. પરંતુ વાહન ક્ષેત્રમાં ઘટાડો નોંધાયો છે. ભારત અને પાકિસ્તાન વચ્ચે સંભવિત યુદ્ધના ભયને કારણે ગ્રાહકોના વર્તનમાં ફેરફારને કારણે આ સ્થિતિ ઉદભવી છે તેમ ઉપલબ્ધ ઉદ્યોગ ડેટાને ધ્યાનમાં રાખી નિષ્ણાતોએ જણાવ્યું હતું.
યુધ્ધના ભયને કારણે ખરીદીમાં વધારો થવાને કારણે એફએમસીજી શ્રેણીમાં ૨૦ ટકા સુધીનો વધારો થયો. પરંતુ આ રાજ્યોમાં વાહનોના વેચાણને જોરદાર ફટકો પડયો છે. આ મહિના દરમિયાન, સિનેમાઘરોમાં દર્શકોની સંખ્યામાં પણ ૫૦ ટકાનો ઘટાડો થયો છે જ્યારે પેટ્રોલ પંપ પર વેચાણમાં પણ ઘટાડો થયો. જોકે, ફાર્માસ્યુટિકલ ક્ષેત્રમાં વેચાણ લગભગ સ્થિર રહ્યું છે.
સૂત્રોએ જણાવ્યું હતું કે ૨૨ એપ્રિલથી ૧૦ મે દરમિયાન, પહેલગામમાં આતંકવાદી હુમલાથી લઈને લશ્કરી કાર્યવાહી બંધ થવા સુધીના સમયગાળા દરમિયાન, આ રાજ્યોમાં તણાવ વધ્યો હતો, પરંતુ લોજિસ્ટિક્સમાં વિક્ષેપ હોવા છતાં ઉપરોક્ત કોઈપણ ક્ષેત્રમાં પુરવઠા સંબંધિત કોઈ ચિંતા નહોતી.
આવા તણાવપૂર્ણ સમયમાં, લોકો ચિંતા કરે છે કે તેઓ તેમની દૈનિક જરૂરિયાતો પૂરી કરી શકશે કે નહીં. તેઓ સામાન્ય રીતે તેલ, લોટ, ખાંડ જેવી દૈનિક જરૂરિયાતોનો સ્ટોક કરે છે. સરહદની નજીકના શહેરોમાં આ વસ્તુઓની ખરીદીમાં ૮ થી ૧૦ ટકાનો વધારો જોવાયો હતો.
સરહદ નજીકના વિસ્તારોમાં ઓપરેશન સિંદૂર દરમિયાન બ્લેકઆઉટને કારણે માલસામાનની અવરજવરમાં વિક્ષેપ પડયો હતો, જેના કારણે લોજિસ્ટિક્સ કામગીરી અસ્થાયી રૂપે બંધ થઈ ગઈ હતી. સરહદી રાજ્યોમાં વાહન વેચાણ અને માલસામાનની હેરફેર પર પણ અસર પડી હતી. જમ્મુ અને કાશ્મીરમાં કારના વેચાણમાં મહિના-દર-મહિનાના ધોરણે ૨૧ ટકાનો ઘટાડો થયો હતો. રાજસ્થાનમાં ૧૮ ટકા અને ગુજરાતમાં ૧૩ ટકાનો ઘટાડો જોવા મળ્યો હતો.
