મુંબઈ : અમેરિકામાં શટડાઉન વચ્ચે બિટકોઈન સ્પોટ એકસચેન્જ ટ્રેડેડ ફન્ડસ (ઈટીએફસ)માં ઈન્ફલો જળવાઈ રહેતા છેલ્લા ચોવીસ કલાકમાં બિટકોઈને ૧,૨૫,૨૪૫ ડોલરની નવી ઊંચી સપાટી બતાવ્યા બાદ નફા બુકિંગે તેમાં પીછેહઠ જોવા મળી હતી. મોડી સાંજે બિટકોઈન ૧,૨૩,૭૪૫ ડોલર કવોટ થતો હતો.
આ અગાઉ વર્તમાન વર્ષના ઓગસ્ટના મધ્યમાં બિટકોઈને ૧,૨૪,૪૮૦ ડોલરની ટોચ બતાવી હતી. બિટકોઈનમાં આવેલા ઉછાળાને પરિણામે ક્રિપ્ટોકરન્સીસની એકંદર માર્કેટ કેપ ૪.૨૨ ટ્રિલિયન ડોલરને પાર કરી ગઈ હતી.
સંસ્થાકીય રોકાણકારોના આકર્ષણ, સ્પોટ ઈટીએફ ઈન્ફલોસ તથા વૈશ્વિક અનિશ્ચિતતા વચ્ચે સેફ હેવન માગને કારણે બિટકોઈનમાં છેલ્લા એક સપ્તાહથી વધારો જોવા મળી રહ્યો છે. ડોલર સામે હેજ તરીકે બિટકોઈનમાં રોકાણકારોનું આકર્ષણ વધી રહ્યું હોવાનો બજારના સુત્રો દાવો કરી રહ્યા છે. અમેરિકામાં શટડાઉનને કારણે કેટલીક મુખ્ય કરન્સીઓ સામે ડોલર નબળો પડી રહ્યો છે. ગયા સપ્તાહમાં બિટકોઈન ઈટીએફસમાં ૩.૨૦ અબજ ડોલરનો ઈન્ફલોસ જોવા મળ્યો હતો.
વિશ્લેષકોના મતે બિટકોઈનમાં વોલેટિલિટી સાથે તેજી જળવાઈ રહેશે. બિટકોઈનની પાછળ અન્ય ક્રિપ્ટોસ એથરમ, એકસઆરપી, બિનાન્સમાં પણ સુધારો જોવાયો હતો. જો કે ઊંચા મથાળે પ્રોફિટ બુકિંગ પણ રહ્યું હતું. એથરમનો ભાવ ૪૫૦૦ ડોલર આસપાસ જોવા મળતો હતો.
વર્તમાન કેલેન્ડર વર્ષના પ્રારંભથી ૩૦ ટકા થી વધુ સાથે મુખ્ય ક્રિપ્ટો બિટકોઈને રોકાણકારોને જંગી વળતર પૂરું પાડયું છે. સંસ્થાકીય રોકાણકારોના વધેલા રસ ઉપરાંત નિયમનકારી સ્પષ્ટતાઓ તથા બૃહદ્આર્થિક સાનુકૂળતાઓને કારણે ક્રિપ્ટો માર્કેટસમાં ખેલાડીઓનો વિશ્વાસ વધી રહ્યો હોવાનું એક એનાલિસ્ટે જણાવ્યું હતું.
