– આઠમાંથી ચાર બેઠક પર સત્તાધારી પક્ષોની હાર
– નેશનલ કોન્ફરન્સે પ્રથમ વખત બડગામ બેઠક ગુમાવી, પીડીપીની વાપસી, પંજાબમાં આપે સત્તા જાળવી
નવી દિલ્હી : કેટલાક રાજ્યોમાં પેટા ચૂંટણી યોજાઇ હતી જેના પરિણામો પણ જાહેર કરાયા છે. જે મુજબ જમ્મુ કાશ્મીરના બડગામમાં પીડીપીની જીત થઇ હતી, જ્યારે રાજસ્થાનમાં કોંગ્રેસે એક બેઠક જીતી હતી. કુલ આઠ બેઠકો પર પેટા ચૂંટણી યોજાઇ હતી જેમાં ચાર પર સત્તાધારી પાર્ટીએ સત્તા ગુમાવી હતી.
રાજસ્થાન, ઝારખંડ, તેલંગાણા, પંજાબ અને ઓડિશા આ તમામ રાજ્યોમાં વિધાનસભાની એક-એક બેઠક પર પેટા ચૂંટણી યોજાઇ હતી, ઓડિશામાં નૌપાડામાં ભાજપના ઉમેદવાર જય ઢોલકિયાએ કોંગ્રેસના ઘાસીરામ માંઝીને ૮૩ હજાર મતોથી હરાવ્યા હતા. જમ્મુ કાશ્મીરમાં બડગામમાં નેશનલ કોન્ફરંસને હરાવીને પીડીપીની જીત થઇ હતી.
જ્યારે જમ્મુ કાશ્મીરની નાગરોટા બેઠક પર ભાજપની જીત થઇ હતી. આ બેઠક પર ભાજપના ઉમેદવાર દેવ્યાની રાણાએ જેકેએનપીપીના હર્ષદેવસિંહને ૨૪૬૪૭ મતોથી હરાવ્યા હતા. નેશનલ કોન્ફરંસના શમીમ બેગમે ડિપોઝિટ ગુમાવવી પડી હતી. વિપક્ષ પીડીપીના આગા સૈયદ મુંતઝીરે જમ્મુ કાશ્મીરની બડગામ બેઠક જીતી હતી. પંજાબમાં તરણ તારણમાં આમ આદમી પાર્ટીએ સત્તા જાળવી રાખી હતી.
પ્રથમ વખત નેશનલ કોન્ફરંસે આ બેઠક ગુમાવવી પડી છે. કોંગ્રેસે રાજસ્થાનની આંતા જ્યારે તેલંગાણાની ઝુબિલી હિલ્સ બેઠક પર જીત મેળવી હતી. ક્રિમિનલ કેસમાં ભાજપના ધારાસભ્ય કંવરલાલ મીણા ક્રિમિનલ કેસમાં દોષિત ઠરતા અયોગ્ય જાહેર કરાયા હતા તેથી આ બેઠક ખાલી પડી હતી. તેવી જ રીતે મિઝોરમમાં ડંપા બેઠક પર વિપક્ષ પાર્ટી મિઝો નેશનલ ફ્રન્ટે સત્તા જાળવી રાખી હતી.
