મુંબઈ : ધિરાણ માગમાં વૃદ્ધિના મળી રહેલા સંકેત તથા એસેટ કવોલિટીમાં સુધારાને ધ્યાનમાં રાખતા વર્તમાન નાણાં વર્ષમાં દેશની બેન્કોની કામગીરી મજબૂત રહેવાની ધારણાં રાખવામાં આવી રહી છે.
વર્તમાન નાણાં વર્ષના પાછલા છ મહિનામાં કોર્પોરેટ તરફથી ધિરાણ માગ ઉપરાંત ગુડસ એન્ડ સર્વિસીઝ ટેકસ (જીએસટી)માં કપાતને કારણ ઉપભોગમાં વધારાને પરિણામે બેન્કોની ધિરાણમાં ૧૧.૫૦-૧૨.૫૦ ટકા વૃદ્ધિ જોવા મળવાની અપેક્ષા એક રેટિંગ એજન્સી દ્વારા વ્યકત કરવામાં આવી છે.
ગત નાણાં વર્ષમાં બેન્ક ધિરાણમાં ૧૧ ટકા વધારો જોવા મળ્યો હતો.
બેન્કિગ ક્ષેત્રમાં ખાસ કરીને જાહેર ક્ષેત્રની બેન્કોમાં નોન-પરફોર્મિંગ એસેટસનું સ્તર હાલમાં નીચું છે અને ધિરાણ ઉપાડ જે મંદ હતો તેમાં હવે વધારો જોવા મળી રહ્યો છે.
રિઝર્વ બેન્ક દ્વારા વર્તમાન વર્ષના ફેબુ્રઆરીથી અત્યારસુધીમાં વ્યાજ દરમાં એક ટકો ઘટાડો કરાયો છે અને આગામી ડિસેમ્બરની બેઠકમાં વધુ પા ટકાના ઘટાડાની અપેક્ષા છે, જે ધિરાણ ઉપાડમાં વધારા માટેનું એક કારણ બની રહેશે.
વધી રહેલા ધિરાણ માગ પ્રમાણે થાપણ વૃદ્ધિ થતી નહીં હોવાથી બેન્કો માટે માગને પહોંચી વળવાનું મુશકેલ બનવાની શકયતા નકારાતી નથી. થાપણથી ધિરાણનું પ્રમાણ હાલમાં ૮૦ ટકા આસપાસ જોવા મળી રહ્યું છે.
ધિરાણ માટે ભંડોળની વ્યવસ્થા કરવા બેન્કો થાપણ ઉપરાંત કમર્સિઅલ પેપર્સ જેવા અન્ય માર્ગો મારફત પણ નાણાં ઊભી કરી રહી હોવાનું તાજેતરના એક અહેવાલમાં જણાવાયું હતું.
સોનાના ઊંચા ભાવને કારણે હાલમાં ગોલ્ડ લોનની માગ ઊંચી જોવા મળી રહી છે. આ ઉપરાંત જીએસટીમાં કપાતને કારણે વાહન લોનમાં પણ વધારો થયાનું બેન્કિંગ ક્ષેત્રના વર્તુળોએ જણાવ્યું હતું. બીજી બાજુ વિઝા સમશ્યાને કારણે વિદેશમાં શિક્ષણ માટેની લોન છૂટી કરવાની માત્રા નીચી જોવા મળી રહી છે.
