Nitish Kumar Convoy Car : બિહારમાં શુક્રવારે એક વિચિત્ર ઘટના બની, જ્યાં મુખ્યમંત્રી નીતીશ કુમારના કાફલામાં સામેલ એક ગાડીએ ડ્યુટી પર તૈનાત એક વરિષ્ઠ પોલીસ અધિકારીને જ ટક્કર મારી દીધી. જોકે, ત્યાં હાજર અન્ય પોલીસકર્મીઓની સતર્કતાને કારણે ટ્રાફિક ડીએસપી મોટી દુર્ઘટનામાંથી બચી ગયા હતા. જો થોડી પણ ચૂક થઈ હોત તો કોઈ મોટો અકસ્માત થઈ શકતો હતો.
આ ઘટના ત્યારે બની જ્યારે મુખ્યમંત્રી નીતીશ કુમાર શીખોના દસમા ગુરુ શ્રી ગુરુ ગોવિંદ સિંહ મહારાજના પ્રકાશ પર્વ નિમિત્તે શ્રદ્ધાળુઓને આપવામાં આવતી સુવિધાઓનું નિરીક્ષણ કરવા માટે પહોંચ્યા હતા.
નિરીક્ષણ દરમિયાન બની ઘટના
જ્યારે CM નીતીશ કુમાર દીદારગંજના બજાર સમિતિમાં બનેલા પ્રકાશ પુંજ પાસે વૉચ ટાવરનું નિરીક્ષણ કરી રહ્યા હતા, ત્યારે જ તેમના કાફલામાં સામેલ સ્કોર્પિયો ગાડીએ ડ્યુટી પર તૈનાત ટ્રાફિક ડીએસપીને ટક્કર મારી દીધી હતી. જોરદાર ટક્કર વાગતા જ ડીએસપી જમીન પર પડતા-પડતા બચ્યા હતા.
ગાડી રિવર્સ લેતી વખતે મારી ટક્કર
જણાવવામાં આવી રહ્યું છે કે જ્યારે મુખ્યમંત્રી સુવિધાઓનું નિરીક્ષણ કરી રહ્યા હતા, ત્યારે સ્કોર્પિયોનો ડ્રાઈવર ગાડીને પાછળ (બેક) કરી રહ્યો હતો. આ દરમિયાન જ ડીએસપીને ટક્કર લાગી ગઈ. જોકે, ત્યાં હાજર અન્ય પોલીસકર્મીઓએ તરત જ પરિસ્થિતિને સંભાળી લીધી અને ડીએસપીને પકડી લીધા. તેમણે ગાડીને પાછળથી હાથ મારીને રોકી દીધી, જેના કારણે એક મોટી દુર્ઘટના ટળી ગઈ.
આ ઘટના બાદ ત્યાં હાજર પોલીસકર્મીઓ સ્કોર્પિયો પાસે ભેગા થઈ ગયા અને ડ્રાઈવરની પૂછપરછ કરવા લાગ્યા. સદભાગ્યે, ડીએસપીને કોઈ ઈજા થઈ ન હતી, નહીંતર મામલો મોટો બની શકતો હતો.
