મુંબઈ : ઓટો રિટેલ વેચાણની દ્રષ્ટિએ નાણાં વર્ષ ૨૦૨૬-૨૭નો પ્રારંભ પ્રોત્સાહક રહ્યો છે. નાણાં વર્ષના પ્રથમ જ મહિના એપ્રિલમાં ઓટો રિટેલ વેચાણ આંક ૧૩ ટકા જેટલો વધી ૨૬,૧૧,૩૧૭ વાહનો રહ્યો છે જે ગયા વર્ષના એપ્રિલમાં ૨૩,૧૨,૨૨૧ રહ્યો છે.
ફેડરેશન ઓફ ઓટોમોબાઈલ ડીલર્સ એસોસિએશન (ફાડા) દ્વારા જારી કરાયેલા અહેવાલ પ્રમાણે ઓટો વેચાણમાં ઊતારૂ વાહનોનો રિટેલ વેચાણ આંક વાર્ષિક ધોરણે ૧૨.૨૧ વધી ૪,૦૭,૩૫૫ રહ્યો છે જે ગયા વર્ષના એપ્રિલમાં ૩,૬૩,૦૨૮ રહ્યો હતો.
ટુ વ્હીલર્સના વેચાણમાં ૧૩ ટકા વધારો રહીને ૧૯,૧૬,૨૫૮ એકમ રહ્યો છે. રિટેલ વેચાણની દ્રષ્ટિએ એપ્રિલ મહિનો ટુ વ્હીલર્સ માટે અત્યારસુધીનો શ્રેષ્ઠ મહિનો રહ્યો છે.
ગુડસ એન્ડ સર્વિસીઝ ટેકસ (જીએસટી)માં ઘટાડા , રિઝર્વ બેન્ક દ્વારા નીચા વ્યાજ દર, રવી મોસમ બાદ ગ્રામ્ય સ્તરે મજબૂત કેશ ફલો તથા લગ્નસરાની મોસમને પગલે એપ્રિલમાં વાહનોના રિટેલ વેચાણમાં નોંધપાત્ર વૃદ્ધિ જોવા મળી છે એમ ફાડા દ્વારા એક નિવેદનમાં જણાવાયું હતું.
સમાપ્ત થયેલા મહિનામાં થ્રી વ્હીલર્સનું વેચાણ ૭.૧૯ ટકા વધી ૧,૦૬,૯૦૮ એકમ રહ્યું છે. કમર્સિઅલ વાહનોના વેચાણમાં પણ ૧૫ ટકા વધારો રહીને ૯૯૩૩૯ વાહનો રહ્યું છે.
નવા નાણાં વર્ષના પ્રથમ મહિનામાં વાહનોનું એકંદર વેચાણ ૧૩ ટકા જેટલુ વધી ૨૬,૧૧,૩૧૭ એકમ રહ્યું છે. એપ્રિલમાં આટલી જંગી વેચાણ વૃદ્ધિ અત્યારસુધીની શ્રેષ્ઠ રહી છે, એમ ફાડાના ઉપ પ્રમુખ સાઈ ગીરીધરે જણાવ્યું હતું.
ગયા નાણાં વર્ષના પાછલા છ મહિનામાં ઓટો રિટેલ વેચાણ આંકમાં આવેલી ગતિ વર્તમાન નાણાં વર્ષના પ્રારંભમાં પણ જળવાઈ રહી છે. ઊતારૂ વાહનોના રિટેલ વેચાણની દ્રષ્ટિએ શહેરો કરતા ગ્રામ્ય વિસ્તારની કામગીરી મજબૂત જોવા મળી છે.
ગ્રામ્ય વિસ્તારમાં વેચાણ વૃદ્ધિ ૨૦.૪૦ ટકા સાથે શહેરની ૭.૧૧ ટકાની સરખામણીએ ત્રણ ગણી રહી છે.
તૃતિય શ્રેણીના શહેરો તથા ગ્રામ્ય વિસ્તારમાં હેરફેર માટે વ્યક્તિગત વાહનોની પસંદગી વધી રહ્યાના આના પરથી સંકેત મળી રહ્યા હોવાનું પણ તેમણે જણાવ્યું હતું.
ઊતારૂ વાહનોનું ઈન્વેન્ટરી સ્તર જે માર્ચમાં ૨૮ દિવસ હતું તે સાધારણ વધી ૩૦ દિવસ સુધી પહોંચી ગયું હતું. આગામી ત્રણ મહિનાના આઉટલુક માટે ડીલરોનો કોન્ફીડેન્સ મક્કમ રહ્યો છે. ફાડાના સભ્ય ડીલરોમાંથી ૫૦.૯૦ ટકાએ વેચાણ વધવાની અપેક્ષા વ્યકત કરી છે જે ગયા મહિનાના સર્વેમાં ૪૯.૮૦ ટકા લોકોએ વ્યકત કરી હતી.
મેમાં લગ્નસરાની મોસમને જોતા ઊતારૂ વાહનો માટેની માગ જળવાઈ રહેવાની ધારણાં મૂકવામાં આવી છે. જો કે વર્તમાન વર્ષનું ચોમાસુ સામાન્ય કરતા નબળુ રહેવાનું તથા પશ્ચિમ એશિયાની તંગદિલીને ધ્યાનમાં રાખતા વેચાણ પર શું અસર પડે છે તે જોવાનું રહેશે.
