Accident in Bodeli: છોટા ઉદેપુરના બોડેલીની મોડાસર ચોકડી પાસે આજે (25મી મે) ગમખ્વાર અકસ્માત સર્જાયો છે. રેતી ભરવા જઈ રહેલા બેફામ ટ્રકે મોડાસર ચોકડી નજીક બાઇકને અડફેટે લીધી હતી. આ અકસ્માત એટલો ભયાનક હતો કે ટ્રકચાલકે બાઇકને અડફેટે લીધા બાદ આશરે ૧૦૦ ફૂટ જેટલી દૂર સુધી રસ્તા પર ઘસડી હતી. આ કરુણ દુર્ઘટનામાં બાઇક સવાર પિતાનું ઘટનાસ્થળે જ મોત નીપજ્યું હતું, જ્યારે તેમનો પુત્ર ગંભીર રીતે ઇજાગ્રસ્ત થતાં તેને તાત્કાલિક સારવાર અર્થે હોસ્પિટલ ખસેડવામાં આવ્યો છે.
પિતા-પુત્ર ઘરે પરત ફરતા નડ્યો અકસ્માત
મળતી માહિતી અનુસાર, અકસ્માતનો ભોગ બનનાર શૈલેષભાઈ બરોડા ડેરીમાં નોકરી કરતા હતા. તે પુત્ર સાથે સાવલી ખાતે ઓફિશિયલ વિઝિટ પૂર્ણ કરીને બાઇક પર પરત ઘરે ફરી રહ્યા હતા. તે દરમિયાન મોડાસર ચોકડી નજીક માત્રેલા સાંડની માફક દોડતા આવી રહેલા ટ્રકે તેમને ચપેટમાં લીધા હતા. શૈલેષભાઈનું ઘટનાસ્થળે જ કરુણ મોત નીપજતાં પરિવાર પર આભ તૂટી પડ્યું છે, જ્યારે ગંભીર હાલતમાં રહેલા પુત્રની હોસ્પિટલમાં સારવાર ચાલી રહી છે.
આ પણ વાંચો: ગુજરાતના 26 લોકસભા સાંસદોએ પણ 384 કરોડની ગ્રાન્ટ મેળવી છતાં 82.47 કરોડ જ ખર્ચ્યા
સ્થાનિકોમાં ભારે રોષ
અકસ્માતની જાણ થતાં જ આસપાસના લોકોના ટોળેટોળા ઘટનાસ્થળે ઉમટી પડ્યા હતા. બોડેલી અને તેની આસપાસના વિસ્તારોમાં બેફામ ગતિએ દોડતા રેતી ભરેલા હાઇવા ટ્રકોને કારણે અવારનવાર આવા અકસ્માતો સર્જાતા હોવાથી સ્થાનિકોમાં ભારે રોષ જોવા મળી રહ્યો છે. ગ્રામજનો અને સ્થાનિકો દ્વારા માંગ કરવામાં આવી રહી છે કે, હાઈવે પર યમદૂત બનીને દોડતા આવા ભારે વાહનો સામે તંત્ર દ્વારા તાત્કાલિક કડક ચેકિંગ હાથ ધરીને કાયદેસરની કાર્યવાહી કરવામાં આવે.
