મુંબઈ : મુંબઈ ઝવેરી બજારમાં આજે સોના-ચાંદીના ભાવમાં તીવ્ર ઉછાળો જોવા મળ્યો હતો. વિશ્વ બજારના સમાચાર તેજી બતાવતા હતા. વિશ્વ બજાર ઉછળતાં ઘરઆંગણે ઈમ્પોર્ટ કોસ્ટ વધી જતાં દેશના ઝવેરી બજારોમાં જે ભાવ ઉછળતાં દેખાયા હતા. વિશ્વ બજારના સમાચાર મુજબ ઈરાન-અમેરિકા વચ્ચે યુદ્ધમાં શાંતિની શક્યતા વધતાં તથા વૈશ્વિક ડોલર ઈન્ડેક્સ તૂટતાં વૈશ્વિક સોનામાં ફંડોનું બાઈંગ વધ્યાના વાવડ હતા.
દરમિયાન, વિશ્વ બજારમાં ક્રૂડતેલના ભાવ આજે ૯થી ૧૦ ટકા તૂટી ગયા હતા. બ્રેન્ટ ક્રૂડના ભાવ બેરલના ૧૧૧.૮૫ ડોલરવાળા ગબડી નીચામાં ભાવ ૯૬.૭૫ થઈ ૧૦૧.૩૫ ડોલર રહ્યા હતા જ્યારે યુએસ ક્રૂડના ભાવ ૧૦૨.૯૬ વાળા નીચામાં ભાવ ૮૮.૬૬ થઈ ૯૩.૬૪ ડોલર રહ્યા હતા.
ક્રૂડ ગબડતાં ઘરઆંગણે આજે કરન્સી બજારમાં રૂપિયો ઉછળ્યો હતો તથા તેના પગલે ઝવેરી બજારોમાં ભાવ વૃદ્ધી તેટલા પ્રમાણમાં સિમિત રહી હતી. દરમિયાન, અમદાવાદ ઝવેરી બજારમાં જે સોનાના ભાવ ૧૦ ગ્રામના રૂ.૩૩૦૦ વધ્યા હતા. જ્યારે ચાંદીના ભાવ કિલોના રૂ.૪૦૦૦ વધ્યા હતા.
વિશ્વ બજારમાં આજે સોનાના ભાવ ઔંસના ૪૫૬૩થી ૪૫૬૪ ડોલર વાળા ઉછળી ઉંચામાં ભાવ ૪૭૨૩ થઈ ૪૬૬૯થી ૪૬૭૦ ડોલર રહ્યા હતા. સોના પાછળ વૈશ્વિક ચાંદીના ભાવ ૭૩.૮૩ વાળા ઉંચામાં ભાવ ૭૭.૮૧ થઈ ૭૬.૨૬થી ૭૬.૨૭ ડોલર રહ્યા હતા.
અમદાવાદ સોનાના ભાવ વધી ૯૯૫ના રૂ.૧૫૫૨૦૦ તથા ૯૯૯ના રૂ.૧૫૫૫૦૦ રહ્યા હતા જ્યારે અમદાવાદ ચાંદીના ભાવ વધી રૂ.૨૪૬૦૦૦ રહ્યા હતા. મુંબઈ બુલીયન બજારમાં આજે સોનાના ભાવ રૂ.૩૦૦૦ તથા ચાંદીના ભૌવ રૂ.૯૦૦૦ ઉછળ્યા હતા મુંબઈ બુલિયન બજારમં સોનાના ભાવ વધી જીએસટી વગર ૯૯૫ના રૂ.૧૫૦૨૫૬ તથા ૯૯૯ના રૂ.૧૫૦૮૬૦ રહ્યા હતા જ્યારે મુંબઈ ચાંદીના ભાવ વધી જીએસટી વગર રૂ.૨૪૯૦૬૭ રહ્યા હતા.
મુંબઈ બુલિયન બજારમાં આજે પ્લેટીનમના ભાવ ૧૦ ગ્રામના રૂ.૬૪૧૯૨ વાળા રૂ.૬૬૭૪૨ થઈ રૂ.૬૫૫૧૯ રહ્યા હતા. વિશ્વ બજારમાં આજે પ્લેટીનમના ભાવ ઔંસના ૧૯૮૪ વાળા ૨૦૫૦ થઈ ૨૦૦૮થી ૨૦૦૯ ડોલર રહ્યા હતા. પેલેડીયમના ભાવ ૧૫૧૩ વાળા ૧૫૬૧ થઈ ૧૫૩૨થી ૧૫૩૩ ડોલર રહ્યા હતા. વૈશ્વિક કોપરના ભાવ આજે ૩.૨૦ ટકા ઉછળ્યા હતા.
