– 5 કલાકની જહેમત બાદ આગ કાબૂમાં આવી
– ખેડા, નડિયાદ, બારેજા, ધોળકા અને અમદાવાદની ફાયર બ્રિગેડની ટીમોએ પાણીનો મારો ચલાવ્યો
નડિયાદ : ખેડા તાલુકાના કાજીપુરા ગામના વૈકુંઠપુરા વિસ્તારમાં આવેલી એક ફૂડ કંપનીની ફેક્ટરીમાં આજે સવારના સમયે કોઈ અગમ્ય કારણોસર ભીષણ આગ ફાટી નીકળતા ભારે અફરાતફરી મચી ગઈ હતી. ખેડા, નડિયાદ, બારેજા, ધોળકા અને અમદાવાદ સહિતના પાંચ ફાયર બ્રિગેડની ટીમો દ્વારા પાંચ કલાકની ભારે જહેમત બાદ આગ પર કાબુ મેળવાયો હતો.
ખેડા શહેર નજીક નેશનલ હાઈવે નંબર ૪૮ પર આવેલા કાજીપુરા ગામના વૈકુંઠપુરામાં આવેલી ફૂડ કંપનીની ફેક્ટરીમાં આજે સવારે લગભગ ૯.૩૦ વાગ્યાના સુમારે આગ ભભૂકી ઉઠી હતી. ફેક્ટરીમાં ફૂડ પ્રોડક્ટ્સ તૈયાર કરીને નિકાસ કરવામાં આવતી હોવાથી આગ ઝડપથી પ્રસરી હતી, જેને પગલે ફેક્ટરીમાં કામ કરતા કર્મચારીઓમાં નાસભાગ મચી ગઈ હતી. પ્રાથમિક જાણ થતા ખેડા ફાયર બ્રિગેડની ટીમ ઘટનાસ્થળે દોડી આવી હતી. ફેક્ટરીમાં ગેસ બોટલ ફાટતાં આગ વધુ વિકરાળ બની હતી અને સમગ્ર ફેક્ટરીને ઝપેટમાં લઈ લીધી હતી. આગની જ્વાળાઓ અને ધુમાડા દૂર દૂરથી દેખાતા હતા. ખેડા મામલતદાર, ખેડા શહેર પોલીસ ટીમ પણ તાત્કાલિક ઘટનાસ્થળે પહોંચી ગયા હતા. આગ કાબૂમાં ન આવતા મેજર કોલ જાહેર કરાતા નજીકના ધોળકા, બારેજા અને નડિયાદ ફાયર બ્રિગેડની ટીમો પણ પાણીના બ્રાઉઝર્સ સાથે દોડી આવી હતી. આગ વધુ પ્રસરતા અમદાવાદ ફાયર બ્રિગેડની પાંચ વોટર બ્રાઉઝર સાથેની ટીમ પણ આગ બુઝાવવા માટે ઘટનાસ્થળે પહોંચી હતી.
ફાયર બ્રિગેડની ટીમો દ્વારા પાંચ કલાક સુધી સતત પાણીનો મારો ચલાવી ભારે જહેમત બાદ આખરે આગ કાબુમાં આવી હતી. જોકે, ફેક્ટરીના કોઈ સ્થળે હજુ પણ ધીરી આગ ચાલુ હોવાનું જાણવા મળ્યું છે. આગ કયા કારણોસર લાગી તે અંગેની તપાસ હજુ ચાલી રહી છે, પરંતુ સદનસીબે આ ઘટનામાં કોઈ જાનહાનિ થઈ નથી.
