અમદાવાદ, મુંબઈ : અમેરિકામાં શટડાઉન લાંબુ ચાલવાની વધી ગયેલી શકયતાને કારણે ગોલ્ડની સેફ હેવન માગમાં વધારો ઉપરાંત ફેડરલ રિઝર્વ દ્વારા વ્યાજ દરમાં કપાતની અપેક્ષાને પરિણામે ે વિશ્વ બજારમાં સોનાના પ્રતિ ઔંસ ભાવ પહેલીજ વખત ૩૯૦૦ ડોલરને પાર કરી ગયા છે. આ અહેવાલો પાછળ આજે અમદાવાદ સોના-ચાંદી બજારમાં સોનું રૂ,૧,૨૪,૦૦૦ અને ચાંદી રૂ.૧,૫૨,૦૦૦ની રેકોર્ડ સપાટીને સ્પર્શી ગયા હતા.
અમેરિકામાં ફન્ડિંંગ બિલને મુદ્દે ડેમોક્રેટ તથા રિપબ્લિકન વચ્ચેની મડાગાંઠનો ઉકેલ હાલમાં નજરે નહીં પડતો હોવાથી હેજ ફન્ડોની લેવાલી જળવાઈ રહી છે.
અમદાવાદ બજારમાં સોનુ ૯૯.૯૦ દસ ગ્રામ દીઠ રૂપિયા ૧,૨૪,૦૦૦ જ્યારે ૯૯.૫૦ના પ્રતિ દસ ગ્રામના ભાવ રૂપિયા ૧,૨૩,૭૦૦ મુકાતા હતા. શનિવારની સરખામણીએ અમદાવાદ સોનું રૂપિયા ૧૫૦૦ ઊંચકાયું હતું. ચાંદી .૯૯૯ એક કિલોના ભાવ રૂપિયા ૨૦૦૦ વધી રૂપિયા ૧,૫૨,૦૦૦ બોલાતા હતા.
શટડાઉનને કારણે ડોલર હાલમાં નીચી સપાટીએ સરકી ગયો છે. સપ્તાહના પ્રથમ દિવસે જ વૈશ્વિક સોનામાં ૪૪ ડોલર વધીને ૩૯૩૦ ડોલર બોલાતા હતા. ઓપેક દ્વારા ઉત્પાદનમાં અપેક્ષા કરતા ઓછો વધારો થવાની ધારણાંને પરિણામે ક્રુડ તેલમાં સુધારો જોવા મળ્યો હતો.
મુંબઈ બજારમાં ૯૯.૯૦ દસ ગ્રામ સોનાના ભાવ જીએસટી વગર રૂપિયા ૧,૧૯,૨૪૯ બોલાતા હતા. જીએસટી સાથે ભાવ ત્રણ ટકા ઊંચા એટલે કે રૂપિયા ૧,૨૨,૮૨૫ મુકાતા હતા. શુક્રવારના સત્તાવાર બંધના ભાવની સરખામણીએ રૂપિયા ૨૦૦૦થી વધુનો વધારો જોવાયો હતો. ૯૯.૫૦ સોનાના દસ ગ્રામના જીએસટી વગરના ભાવ રૂપિયા ૧,૧૮,૭૭૧ મુકાતા હતા. જીએેસટી સાથે ભાવ ત્રણ ટકા ઊંચા મુકાતા હતા.
ચાંદી .૯૯૯ એક કિલોના જીએસટી વગર રૂપિયા ૧,૪૮,૮૩૩ બોલાતા હતા. જીએસટી સાથે ભાવ ત્રણ ટકા ઊંચા એટલે કે રૂપિયા ૧,૫૩,૩૯૭ બોલાતા હતા. શુક્રવારના સત્તાવાર બંધ ભાવની સરખામણીએ મુંબઈ ચાંદીમાં રૂપિયા ૩૦૦૦થી વધુ વધ્યા હતા.
અમેરિકામાં શટડાઉન લાંબુ ચાલવાની વધી ગયેલી શકયતાને કારણે ગોલ્ડની સેફ હેવન માગ જળવાઈ રહેતા વિશ્વબજારમાં હાજર સોનામાં પ્રતિ ઔંસ ૪૦ ડોલરથી વધુનો ઉછાળો આવી ભાવ ૩૯૨૮ ડોલર કવોટ થતા હતા. ચાંદી પ્રતિ ઔંસ વધી ૪૮.૪૪ ડોલર મુકાતી હતી. અન્ય કિંમતી ધાતુ પ્લેટિનમ ૧૬૩૮ ડોલર જ્યારે પેલેડિયમ ઔંસ દીઠ ૧૨૯૩ ડોલર મુકાતું હતું.
ઓપેક તથા સાથી દેશો દ્વારા નવેમ્બરમાં ક્રુડ તેલના ઉત્પાદનમાં વધારો અપેક્ષા કરતા નીચો રહેવાની ધારણાંએ ક્રુડ તેલમાં સુધારા તરફી વલણ રહ્યુ હતું. માગ નબળી રહેવાની શકયતાએ ઓપેક ઉત્પાદનમાં ઓછો વધારો કરશે તેવી ગણતરી મૂકવામાં આવી રહી છે. નાયમેકસ ડબ્લ્યુટીઆઈ પ્રતિ બેરલ ૬૧.૩૫ડોલર જ્યારે આઈસીઈ બ્રેન્ટ ક્રુડ ઓઈલ મોડી સાંજે પ્રતિ બેરલ ૬૫.૧૩ ડોલર મુકાતું હતું.
