SBI Bank Employee Strike News | ભારતની સૌથી મોટી જાહેર ક્ષેત્રની બેંક, સ્ટેટ બેંક ઓફ ઈન્ડિયા (SBI) ના કર્મચારીઓએ પોતાની વિવિધ માંગણીઓને લઈને આક્રમક વલણ અપનાવ્યું છે. આગામી 25 અને 26 મેના રોજ દેશભરના SBI કર્મચારીઓ હડતાળ પર જશે, જેના કારણે બેંકિંગ સેવાઓ ખોરવાઈ શકે છે.
કુલ 16 માગણીઓ સાથે હડતાળ
ઓલ ઈન્ડિયા સ્ટેટ બેંક ઓફ ઈન્ડિયા સ્ટાફ ફેડરેશન (AISBISF) એ મેસેન્જર અને આર્મ્ડ ગાર્ડ્સની ભરતી, આઉટસોર્સિંગ બંધ કરવા અને પેન્શન સંબંધિત વિસંગતતાઓને દૂર કરવા જેવી કુલ 16 માંગણીઓ સાથે 25 અને 26 મે 2026 ના રોજ દેશવ્યાપી હડતાળનું એલાન આપ્યું છે. જો આ તારીખો દરમિયાન જાહેર રજા હશે, તો હડતાળ 27 મે સુધી લંબાવવામાં આવશે.
કર્મચારીઓના અધિકારો અને સુરક્ષા પર સવાલ
ફેડરેશનના જણાવ્યા અનુસાર, બેંકમાં કાયમી નોકરીઓનું આઉટસોર્સિંગ કરવામાં આવી રહ્યું છે, જે કર્મચારીઓની સુરક્ષા અને ભવિષ્ય માટે ખતરો છે. છેલ્લા ત્રણ દાયકાથી સબોર્ડિનેટ કેડરમાં નવી ભરતીઓ બંધ હોવાથી કર્મચારીઓ પર કામનું ભારણ વધ્યું છે. ખાસ કરીને સુરતની SBI બ્રાન્ડમાં થયેલી લૂંટની ઘટનાનો ઉલ્લેખ કરતા યુનિયને આર્મ્ડ ગાર્ડ્સની ખાલી પડેલી જગ્યાઓ તાત્કાલિક ભરવાની માંગ કરી છે.
પેન્શન અને વેતન વિસંગતતા
બીજો મુખ્ય મુદ્દો NPS (નેશનલ પેન્શન સિસ્ટમ) હેઠળના કર્મચારીઓનો છે. તેમને પેન્શન ફંડ મેનેજર બદલવાનો વિકલ્પ આપવામાં આવતો નથી, જે અન્ય જાહેર ક્ષેત્રની બેંકોમાં ઉપલબ્ધ છે. આ ઉપરાંત, વેતન વધારામાં પણ વિસંગતતાનો આરોપ લગાવાયો છે. યુનિયન મુજબ, અધિકારીઓને વેતનમાં આશરે 22% નો વધારો મળ્યો છે, જ્યારે કામદારો (Workmen) માટે તે માત્ર 17% પર જ સીમિત રાખવામાં આવ્યો છે.
SBI કર્મચારીઓની 16 મુખ્ય માંગણીઓ
1. મેસેન્જર્સની નવી ભરતી કરવામાં આવે.
2. આર્મ્ડ ગાર્ડ્સની ખાલી જગ્યાઓ ભરવામાં આવે.
3. NPS કર્મચારીઓને પેન્શન ફંડ મેનેજર બદલવાનો વિકલ્પ મળે.
4. 2019 પછી જોડાયેલા કર્મચારીઓને ‘ઇન્ટર સર્કલ ટ્રાન્સફર’ની મંજૂરી અપાય.
5. કાયમી નોકરીઓનું આઉટસોર્સિંગ તાત્કાલિક બંધ કરો.
6. બેંકમાં પૂરતા પ્રમાણમાં સ્ટાફની ભરતી કરો.
7. વેતન વધારામાં જોવા મળતી અસમાનતા (Parity Issue) દૂર કરો.
8. ‘કરિયર પ્રોગ્રેશન સ્કીમ’ની સમીક્ષા કરવામાં આવે.
9. 10મા દ્વિપક્ષીય નિવૃત્ત કર્મચારીઓને નેશનલ 8મો ઇન્ક્રીમેન્ટ લાભ મળે.
10. ફિઝિશિયન કન્સલ્ટેશન ચાર્જીસમાં સુધારો.
11. મેડિકલ રિઈમ્બર્સમેન્ટ સ્કીમમાં સુધારો કરવો.
12. 7મા BPS નિવૃત્ત કર્મચારીઓના પેન્શનમાં તમામ પગાર ઘટકો ઉમેરવા.
13. HRMS સોફ્ટવેર સંબંધિત સમસ્યાઓનું નિરાકરણ.
14. ‘વર્કમેન એમ્પ્લોયી ડિરેક્ટર’ની નિમણૂક.
15. PF ટ્રસ્ટી નોમિનીની નિમણૂક.
16. ક્રોસ-સેલિંગના નામે થતું ‘મિસ-સેલિંગ’ બંધ કરો.
